Gunjing Yang Nyaroke

"Makan lah dulu jok.. Pas nian kau datang" Ujiku ke kawan yg baru datang.

"Makanan apo dio jok... " Uji kawan tu sambil bukak kantong asoy.

"Biaso jok..Gunjing dgn bongkol beli di 7 ulu, Dasar rezeki kau nian" uji ku lagi

"Katek sambel nyo apo jok ? " Tanyo kawan tu

"Dak katek kato bibik nyo blm buat" Ujiku.

Walau dak besambel sikok- sikok gunjing dgn bongkol ini tumpes jugo, di rewangi dgn teh manis tambah pas.

"Tau dak jok.. Kenapo namo makanan ini gunjing? " Nanyo kawan tu dgn muko serius.

"Lah dari sanonyo namonyo tu gunjing" Ujiku singkat.

"Ku cerito ke sejarah nyo duken kalu wong galak makan makanan ini sore hari sambel duduk di bale rumah..Secaro wong lamo jok..Di situlah mereka tu banyak sambel ngomongi wong.. Apo bae di omonginyo galo" Terputus cerito tu sambil dio ngirup teh manis.

"Terus" Ujiku

"Ado yang lewat sambil nyeletuk, Oi kamui begunjing bae banyak2 istighfar,..Kareno ado yang penasaran dengan makanan yg di kunyah wong di bale, tapi malu nak betanyo...Saat dio denger gunjing..akhirnyo dio nyimpulke namo makanan itu gunjing" Cerito nyo seru nian.

"Ai.. Macak-macak cerito kau jok... Besak kelakar" Sambil aku monyong ke bibo nguyok dio.

Makanan yang terbuat dari tepung beras di campur kelapo parut, banyu & sedikit garam & di masuke ke jero cetakan, & di bakar di baro api wajar kalau gunjing ini sudah susah di temui kecuali di sekitaran seberang ulu.

Kalu di pedamaran namonyo bukan gunjing tapi bingko Ella, bentuk & raso jugo samo persis. gunjing jugo ado 2 jenis ado yg gurih ado yg manis, kalau aku lebih seneng yg gurih pacak di makan pake cabe, cak cabe kemplang tunu.

"Jok...nak nanyo ado apo kau nyuruh aku ke rumah kau nih? " Tanyo kawan tu.

"Cak ini jok,.Makan sudah, minum jugo sudah, aku nak mintak tolong" Ujiku

"Tolong apo, kalu nak minjem duet aku jugo buntu, Taulah dewek kau jok? " Tanyo kawan ku lagi.

"Rewangi aku ngangkat lemari, nak di pindah ke kamar anak aku" Ujiku santai

"Ai jok, Ngajak patah pinggang kalau cak ini" Katonyo sambil mencucu

Sambil bejalan aku tesenge...dalam ati ngomong"Lantaklah jok, kau kalah samo gunjing nak ngoceh payo yg penting lemari aku te angkat"