Karamunting & lidah Ulo

Foto by Steemit

"Makani apo jok... ? " Tanyo ku ke kawan tu.

"Makan buah ini nah " Sambil tangan nyo nunjukin buah yah berwarno agak ungu ini, tejingok lidah kawan tu jugo jadi ungu.

"Beracun dak jok?, Ngapo lidah kau jadi ungu cak itu" Kato ku lagi.

"Idak jok.. Aman" Kato kawan tu.

Ku ambilah sikok buah tanaman ini yang sudah merekah, manis nyo khas buah utan, bukan cak manis buah mangga., oleh kareno banyak buah yang masak akhirnyo di makani sikok-sikok.

Gara-gara dari pagi tadi di ajak kawan macing ke arah buyut, umpan iwak banyak di bawak tapi umpan untuk kitonyo dak bawak samo sekali teko korek lupo bawak, laju makani buah utan ini untuk ganjel perut.

Jauh dari Kato kenyang, justru lidah berubah cak lidah ulo jadi ungu, untung masih bawak banyu putih untuk minum.

Iwak betok yang sudah ado cak 15 ikok jadi nganggur bae, kalau bawak korek pacaklah di panggang jadi makan siang ini.

"Lajulah jok.. Makan lah... Masih banyak" Kato kawan tu.

Cuma pacak nyengir bae.. Tau dewek walau makan sebanyak apo pun dak bakal kenyang.

Karamunting cak itulah tumbuhan ini di sebut tapi ado jugo yg nyebutnyo seletup,

Baru tau sekarang kalau tumbuhan liar ini banyak kegunoan, dari akar yang pacak jadi obat naek ke trombosit, samo menghambat bakteri. Daunyo pacak untuk obat penyakit uap, obat diabetes dan untuk luko, dan buah nyo dewek bagus untuk pencernaan, nambah hemaglobin darah dan gangguan siklus bulanan pada wanita.

Dulu saat ayuk masih bayi nangis dak berhenti kareno panas dalem oleh tetanggo jugo di kasih tumbuhan ini untuk meredake panas dalam nyo.

"Jok.. Aku sakit perut" Katoku ke kawan tu

"Ke sawah di ujung itu bae jok" Kato kawan sambil nujuk tempat nyo.

"Ado ulo dak jok....? " Kato ku

"Katek jok.... Lidah kau sudah cak ulo, dak berani ulo deket ke kau" Kato kawan sambil menjulur ke lidahnyo.

Sambil nyenge dengan kawan tu sambil megangj perut tekacarkacar ke tempat untuk setoran perut. Ingat pepatah lamo "Bagai ta* di ujung pantat".