Dak sah jok .......kalu cak itu

Foto by Facebook

Dari tadi jingok model dio meci ekar yg ado di lingkaran agak aneh, mano ekar yg di pecinyo bedepas depis pacak peluru keluar dari senapang bae buat kito te diam bae, shinggo buyar galo ekar di dalam lingkaran itu, menang terus kawan tu, apo lagi tembaakannyo saat stend (tegak)  laju nian habis galo ekar nyo dak besisa lagi.

Kalau wong meci ekar pake jari telunjuk atau tengah , melingkar ke bawah dan di bantu jari telunjuk sikoknyo untuk nahan ekarnyo. Kalau dio ini pecak nak mbetet pake jari tengah yang tecungak ke atas pecak model "fuc* *", tapi bagian tapak tangan untuk mecinyo, tangan jari sikoknyo megang ekar untuk ngincer ekar yg nak di peci.

Asli kawan yg paling kuat meci ekar diantara kami bae cuma pacak tediam nyinggok gaya maen kawan sikok ini. Tau dewek peciannyp jarang yg meleset buat ekar kami balik ke dio galo.

" Dak sah jok.. Kalau kau maen cak itu" Uji kawan

"Aponyo dak sah jok.... Kan yang penting meci ekar" Uji kawan yg menang ini sambil ngereken ekar di dalam kaleng kon gu an.

"Tapi jok... Kito ni jadi cepet nian manennyo... habis galo ekar ni lantak kau galo " Uji kawan tu

Entah cak mano akhir cerito omongan mereka tu ujungnyo mereka bebala, sudah beguling-guling di tanah, kami cuma diam bae sambil besurak bae.

Dak lamo bapak nyo keluar, kareno kebetulan kami maen di halaman rumah nyo, asli kami keno siram pake banyu cucian bekas mobil, jadi yg belago samo idak keno galo.

Bapak kawan ini supir angkot kawan ni kadang melok ngenek kadang cuma noke bae ( duduk di kursi belakang angkot cuma keliling-keliling bae), uniknyo di kakinyo banyak nian tumbuh kutil jadi cak batang cermin bae jingoknyo, dari deket paha same ke mato kaki, pernah sampe di siram bapaknyo pake banyu aki mobil biar kutil nyo sembuh

Sejak kejadian itulah dak ado yg galak ngajak lagi kawan tu maen ekar.

"Dak usah melok-melok jok.. Kami dak ngajak kamu  main pecian ini" Uji kawan yg pernah bebala dengan dio.

Kami pun main di tengah jalan idak di depan rumah nyo lagi, takut keno siram ubak nyo lagi. Kawan tu cumah duduk bae, sambil ngitung ekar yang ampir setengah kaleng Kong gu an.

"Dak apo aku dak melok maen... Aku jingok dari sini bae" Uji kawan ni sambil megang kaleng ekarnyo.

Dak lamo tu dio mekik-mekik ;

"Siapo nak beli ekar dengan aku bae, 8 iko 50 piah... " pekik kawan tu

Kareno dio mekik-mekik akhirnyo banyak budak tepengaruh berenti maen laju beli ekarnyo, kereno kalu di warung 50 piah cuma dapat 4 biji. Akhirnya yg maen ekar tadi laju berenti.

"Kito maen tenggoan (tebakan) bae dak usah pecian" Uji kawan yg jual ekar tu

Jingok ide cak itu kawan lain jadi melok galo menang, retinyo sudah berapo putaran kawan yang jual ekar ini menang terus memang gandek nian budak ini maen ekar, idak pecian idak tengguan menang terus, sampe berapo kali dio jual ekar ke kawan -kawan shinggonyo panen dio hari itu.Tapi cak itulah namonyo maenan budak, idak ekar idak gambaran idak karet pasti ado yang jadi pemenang nyo dan buat yang lain abis tumpes.

"Mati jok.... kalah galo kami ni...." uji salah sikok kawan tu

Sambil nyenge bae kawan tu nguncangi kaleng kong gu an nyo yang berisi banyak kaleng

"Berenti nak maen ekar..... kalu cak itu kito maen lain bae" uji kawantu lagi

"Kito mandi bae di anak sungi aur ... kalu budak ini dak biso berenang kito berak ke dikit di sungi tu"bisik kawan tu dengan kawan nyo yang lain yang sempat tedenger oleh aku dikit.

"Cak mano kalu kito berenang di anak sungi aur bae ???" tanyo kawan tu.

"jadi" saut kawan yang lain

"Kau melok dak ...... kalu nak teberak dak usah igo?" tanyo kawan tu lagi dengan kawan yang menang terus main ekar.

"jadi aku melok" ujinyo singkat

Dak lamo bejalan ke arah anak sungi aur, kami pun sampe di pucuk jembatan kayu yg di bawahnyo ado anak sungi, ternyato kawan yang menang main ekar ini langsung bukak baju dan langsung ngajok ke sungi, buat budak tekejut galo... malahan yang ngajaki tadi turun dari jerambah tempat betino mandi.

"turun jok mandi........wong sudah berenang galo" pekik kawan-kawan nyo

" Di sini bae jok..... aku belum pacak nian berenang" uji kawan tu

" Hu....... besak kelakar jugo kau ini....... kiroin hebat nian" uji kawan-kawannyo sambil besorak.

"Hoi....... kalu nak mandi jangan ribut igo gigi ku lagi sakit" pekik wak tuo muncul dari jendelo yg rumahnyo di pinggir sungi itulah.

setengah tekejut kami jawab "Iyo wak"

"Diam bae jok... mak wok lagi sakit gigi,,,kalu rebut kagek buayo di sini di timbul kenyo", kareno kami taunyo dulu mak wo ini ngerupoke dukun, walupun dukun beranak.