Perang-Perangan Zaman Dulu

Foto by Kaskus

"Kau jadi belando jok kami jadi tentara Indinesia" Uji kawan tu saat bage kelompok untuk maen perang perangan.

Tejingok ado kawan yang tediam bae, "kau nak jadi apo jok..... Belando apo Indonesia ? " Tanyo ku.

"Aku nak jadi tuan tanah bae, kayo... Pecak kito nonton film si pitung kemaren" Ujinyo yang buat kami laju tengangak.

"Lajulah kau nak jadi apo bae terserah kau... Jadi piak belando tapi cak itu kalu film si pitung kemaren" Uji kawanku yg sikok lagi.

Kawan yg nak jadi tuan tanah jadi nyenge bae, sambil bejalan ke piak belando,

Mulai kami nyari batang keladi untuk di buat senapang, dak peduli nak gatal getah atau kotor yang penting seru, lokasi maen di lapangan yg banyak semak samo pohonyo, kalau sekarang lapangan itu sudah berubah jadi bedeng galo.

Ado yg ngiket kepalak pake tali plastik ado jugo yg bawak bendera dari celano dan baju warno merah putih, entah jemuran siapo yg di embat nyo.

Ado badanyo yang pake rumput biar pacak nyamar, entah gatal apo idak cuma kawan tu yg ngerasoke.

Jaman itu maen ada ado yang beli, maenan buat galo dari batang keladi, batang jambu, buluh/bambu, daun nangko dan banyak lagi.

Terinspirasi dari film Lebak membara, serangan fajar, kereta api terakhir atau janur kuning yang sering ditayang ke oleh TVRI.

"Serbu..... "Pekik kawan tu yg piak Indonesia.

Dari depan tedengae perintah yg samo dari piak belando.

Sambil mulut bebunyi sambil tangan nguntalke potongan batang keladi yang ecaknyo granat.

Ado yg tiarap, ado yg sumputan di semak, ado yg manjat pohon.... Pokoknyo bebas cuma sore ari yg biso ngentike maenan perangan cak ini.

Kawan yg nak jadi tuan tanah tadi tejingok duduk bae di bawah bambu dak melok perang mungkin jago markas.

"Kito untalke keladi bae budak tu" Uji kawan mulai jahil

"Mati.... Meledak" Uji ku saat jingok keladi yg di untal tadi keno badannyo.

"Dak pacak jok.... Aku idak mati.. Aku ni di dalam kubah besi" Uji kawan tu.

Kami cuma biso nyenge bae

"Oi... Jok kitoni maen perang-perangan bukan maen film james bond.... Salah nonton film kau ni jok" Uji ku sambil tekekek.

Selamat hari pahlawan

10 November 2021

Kelio Jengkol Buatan Ibuk

Foto by cookpad

"Makanlah...sengajo ibu buat untuk kalian" Uji ibuk sehabis besaji di meja makan.

Tejingok ado ayam opor kering, lalapan ado jugo buah lumai, ikan lele goreng + kecap asinnyo, & paling mencolok kelio jengkol bewarno kuning.

"Ini dio ngelemake makan" Uji ku

Ibuk cuma tersenyum bae, itulah salah sikok kebiasaan ibu kalau kami betandnag kesano pastilah masakke yang lemak-lemak. Apo lagi sejak ayah yang sudah 1 tahun menghadap Ilahi, sangat senang kalau kedatangan anak cucung nyo.

Masakan ibuk yg paling lemak kelio jengkol inilah kareno rasonyo itu luar biaso, dulu saat kecik pernah sampe kejengkolan atau di gigit jengkol kareno terlalu banyak makan jengkol buatan ibuk. Tapi ibuk idak panik aku justru di suruh minum manis madu dan minyak sayur biar kencing lancar lagi, krn kalau Kejengkolan itu sakitnyo bukan main.

Tapi walaun cak itu dak buat aku jero untuk makan jengkol yg berbau tapi nikmat ini. Kadang tahan mesan ke ibuk untuk minta di buat ke kelio jengkol ini. Tapi walau cak itu aku dak galak makan jengkol mentah walaupun kato wong lemak

Memang kelio buatan ibuk ini luar biaso pernah jugo nyuruh bunda untuk buat kelio jengkol tapi rasonyo belum samo cak punyo ibuk.

Tapi itulah namonyo wong tuo yang selalu nak buat anak cucung nyo senang

Ibuk idak pinter-pinter nian cak mak wong lain tapi sikok apo yang di masak ibuk membuat aku pengen balik ke rumah di mano aku di besak ke. Kalau dulu masih gawe di luar kota terkadang kito dibekeli makanan cak sambal teri kacang yang katonyo biso awet be minggu-minggu tapi lantak kawan sehari biso habis.

Itulah salah sikok keistimewaan ibuk, sang malaikat dak besayap.

Barakallah fil umrik ibuk semoga Allah selalu memberkahi kehidupanmu.

Gunting Ragum & Model Catam

Foto by Alibaba

"Aduh.. " Jerit ku saat rambut tejepit di gunting ragum.

"Ngapo dek?" Kato mamang tukang gunting itu santai nian.

"Tejepit mang" Ujiku lagu.

Cak inilah dulu kalau rambut sudah gondrong, ayah pasti ngjak ke bawah proyek, kareno di pangkal proyek 7 ulu bejejer tukang gunting rambut.

Bukan model tukang gunting rambut sekarang yg keren, pake label barber shop, pake clipper electric samo pelayanan prima lainnyo.

Entah ngapo ayah selalu nyuruh dengan mamang yg ini entah kawan ayah atau bukan, mato yg agak picek jadi ciri khas dio, modal cuma kursi dan meja untuk tempat alat cukur dan kaco yang agak besak. Alat cukur yg masih manual saat dio ngasal mato ragum nyo bae samo cak ngasah piso.

Dari TK sampe kelas 6 di sini terus begunting nyo, model pun katek model lain yaitu "catam", dengan jambul dikit di depan buat kito pecak apo bae, tapi model ini cepet nian mamang nyo nggaweke nyo modal ragum bae kito langsung botak tinggal di sisai di bagian depan, yang agak ngeri saat mamang ini ngeluarke piso untuk ngerok anak rambut yg di asah nyo dengan kulit yg tegantug di meja cukur itu.

Tapi lemaknyo be gunting di sini anginyo mantab, kadang sampe tetedok pas lagi begunting, kalau la mak ini jadi susah mamang gunting nyo.

Becampur mobil untuk mudik ke arah dusun, jadi tempat gunting ini idak pacak di omongke nyaman, ado yg jual buku, jual rokok, kantong asoy pokoknyo macem-macem.

"Tukang gunting tu kawan ayah ye ?" Tanyo ku

"Iyo.. Dulu kawan samo-samo SMA" Uji ayah

"Wajarlah dak pernah beganti tukang cukur kito ni" Ujiku sambil ngelus kepala catam ku

"Biarlah sekalian nolong kawan" Uji ayah lagi.

Pas lagi lemak ngobrol datang pedagang sambil bawak buku nawarke dengan wong dj sebelah kami ;

"Kak TTS baru... Petruk, anny arrow jugo ado kak " Tawar penjual buku itu.

Aku cuma pacak jingok bae kareno dak tau, tapi cak nyo buku tipis be bungkus plastik jadi di beli kakak itu.

••• Mengenang 365 Hari Kepergian Ayah

Kalu Nak Nonton Mandi Dulu

Foto by Olx

"Siapo nak nonton mandi dulu" Ujik mak kawan aku.

Dak heran kalau di rumah kawan tu setiap sore mulai jam sengah empat sudah mulai rame kareno rumah dio sikok-sikoknyo yang sudah ado TV bekelir dan parabola di lorong ni, Kalau jaman dulu yang punyo barang cak itu pasti di sebut wong kayo.

Kito dengan beberapo kawan lainnyo sebenernyo jugo punyo TV tapi masih item putih merek jhonson yg kalau nak ngidupkenyo harus narik salah sikok tombol nyo keluar, pernah sampe tecabut tombol nyo tu lantaran kuat igo nyabut tombol nyo, tapi di teken lagi waras lagi tombol si jhonson itu.

Tapi tau dewek era tahun 1984-1990 an TV masih jadi barang yang langkah, apo lagi TV yang bekelir. Di tambah parabola.. Ceto cuman yg sugih bae yg pacak belinyo.

Banyak kawan yang besiget baklek ke rumah nak mandi termasuk kito, kareno kalau ketinggalan dak seru, kalu sore jam 4 ado film kartun yang tayang di TVRI katek siaran lain, gara-gara gawe TV bekelir ini buat wak ngaji marah-marah kareno kito banyak dak ngaji.

Tau dewek kalu dak mandi bekas ingus yang di lap pake ujung tangan baju, bauk keringet yg tebakar matohari, mano kaki dak besendal... Cocok nian.

Kalau lagi ari minggu nonton jero parabila, tontonan doraemon samo kartun lain banyak nian pecak dak berenti lagi film kartun, walau pun dak ado terjemahan nyo yang penting jingok kelir nyo bae sudah sesuatu yg amazing.

"Kamu beduo di luar bae, rumah kami dak muat lagi" Kato kawan yg punyo TV bekelir tu.

Asli raso nak tenangis zaman itu wong di dalam galo kito di suruh nonton dari luar, yang didalam rumah tekakak kareno tontonan lucu kito tejonon tegak dak keruan di luar.

Tapi nak cak mano lagi, TV punyo dio, rumah punyo dio.... , akhir nyo kami beduo balek kerumah aku nonton si jhonson inilah samo kawan tu walaupun item putih seidaknyo kami idak tejonon di luar rumah wong beduo.

Nasib..... Nasib... 😥😥😥