Sebagian tempat nyebut setuo ini lampu sentir, lain tempat nyebutnyo lampu colok, ado jugo yg nyebutnyo lampu duduk, entah macem-macem sebutan nyo yg pasti gunonyo kalau malam untuk penerangan walau seadonyo.
Tahun 80-90 an listrik belum tesebar merato cak sekarang walupun tengah kota, dengan tegangan 110 sering nian listrik pidem atau turun spaning yg galak mutuske bola pijar.
Jadi kalau malam lampu yg berisi minyak tanah inilah yang jadi solusi penerangan, memang ado jugo kalu wong sugeh dio pake lampu strongkeng yang lebih terang atau lampu badai yang terang dikit dari lampu teplok ini.
Seru jugo kalu inget zaman mak itu, kalau deket igo lubang idung pacak itam galo apo lagi pas lagi tiduk, dak sedikit kejadian kebakaran kareno dak ati-ati pake lampu ini.
Tapi untuk budak kecik justru lampu ini jadi tempat sarana maen bayangan tangan, atau wong tuo becerito tentang binatang kancil atau cerito apo bae, sambil niduke kito adek-beradek, maklum mano gelep & rumah sempit jadi ngumpul jadi sikok.
Tapi justru hal cak iini dak di dapet lagi sekarang ni, lampu terang juatru anak-anak jadi dewek-dewek apo lagi sudah pegang HP.
Itulah saat pertamo kali pindah rumah lampu ini sempat beli 3 ikok tapi sampai saat ini tesisa 2 kareno sikok nyo nyampak dan pecah, mano minyak tanah sekarang lebih mahal di banding premium dan jugo susah nyarinyo idak setiap warung ado jual minyak tanah jadi lampu teplok ini cuma nempel bae di dinding rumah.
Kadang kalau mati lampu tepikir jugo nak ngidupke lampu teplok ini, tapi itemnyo itu yang buat repot nak bersihkenyo. Mano lampu emergency jugo sekarang ini lebih praktis pemakainnyo dan murah rego nyo.
No comments:
Post a Comment